भारतीय सीमासित जोडिएका कञ्चनपुरमा पछिल्ला वर्षमा लागुऔषध दुर्व्यसन यहाँको मुख्य चुनौतीका रुपमा देखा पर्दै गएको छ । खुला सीमानाका कारण भारतबाट विभिन्न किसिमका लागुऔषध भित्र्याउने र बिक्रीवितरण गर्न नेपालीदेखि भारतीयसमेत संलग्न छन् । कञ्चनपुरमा पछिल्लो समय सबैभन्दा बढी लागुऔषध दुर्व्यसनमा मुद्दा रहेको जिल्ला प्रहरी कार्यालय कञ्चनपुरले जनाएको छ ।
जिल्ला प्रहरी कार्यालय कञ्चनपुरले बितेको एक वर्षमा मात्रै नेपाली र भारतीय गरेर २३४ लाई लागुऔषधसम्बन्धी मुद्दा चलाएको छ । जुन हालसम्मकै बढी सङ्ख्या हो । खासगरी युवापुस्ता खैरोहिरोइन नाम लागुऔषध भारतबाट ल्याउने सेवन गर्ने र यहाँबाट अन्यत्रसमेत पैठारी गर्ने गरेको प्रहरी अनुसन्धानले देखाएको छ ।
लागुऔषध दुर्व्यसन जिल्लाको मुख्य चुनौती रहेको बताउँदै जिल्ला प्रहरी कार्यालयका प्रमुख प्रहरी उपरीक्षक श्यामसिंह चौधरीले यसको न्यूनीकरणका लागि प्रहरी सक्रिय रहेको बताउनुभयो । “हामीसत भएका साधनस्रोत परिचालन गरेर जिल्ला प्रहरी प्रहरी तैनाथ छ ।” नागरिक सचेतना र विद्यालयमा समेत लागुऔषधसम्बन्धी जनचेतनामूलक कार्यक्रम गर्न प्रहरी सक्रिय छ ।” लागुऔषध मुद्दामा पक्राउ पर्नेमा १३ जना भारतीय नागरिकसहित २१४ पुरुष र सात जना नेपाली महिला समेत छन् । प्रहरीका अनुसार लागुऔषध ओसारपसारमा भारतीय नागरिकको सहजीकरण भएकाले पनि थप समस्या हुने गरेको छ ।
लागुऔषध दुर्व्यसन नियन्त्रणका लागि अभिभावकको पनि मुख्य भूमिका रहनुपर्ने प्रहरीको भनाइ छ । यहाँ हरेक दिन लागुऔषधसहित युवक पक्राउ परिरहेका छन् । कञ्चनपुरमा दोधारा चाँदनी, बेलौरी, बेल्डाडी र पुनर्वास क्षेत्रमा सीमानाकाबाट बढी मात्रामा लागुऔषधको अवैध कारोबार हुने गरेको छ ।
महेन्द्रनगरमा दशकौँदेखि धुम्रपान निषेधको अभियन्ताका रुपमा सक्रिय मदन चन्दले युवा लागुऔषधको लत मा हुँदा नै समाजमा विभिन्न प्रकारका आपराधिक घटना हुने गरेको बताउनुभयो । “प्रहरीले मात्रै लागुऔषध नियन्त्रणमा सक्रिय भएर मात्रै पुग्दैन्”, उहाँले भन्नुभयो, “अभिभावक सजक नभएसम्म सबैकुरा हुन सक्दैन ।” लागुऔषध रोकथामका लागि स्थानीय तहहा पनि सचेतनामूलक कार्यक्रम सञ्चालन गर्नुपर्नेमा जोड दिनुभयो । “पालिकाहरूसित लागुऔषध रोकथामका लागि जनप्रतिनिधिलाई ज्ञापन समेत दिएका छौँ ।” उहाँले भन्नुभयो, “यसमा राजनीतिक दलदेखि विद्यार्थीसम्मको सहयोग चाहिन्छ ।”
